(Madda Oduu ABO/MOA/Hagayya 23,2009) Odeessi waranaa dirree baha irraa nu gahe akka mirkaneessutti, WBOn godina Bahaa Harargee Lixaa keessa sossoohu, Hagayya 19,2009 Ona Daaroo Labuu bakka Cirracha Qal’aa je’amtutti haxxee hidhuun waranaa wayyaanee rukutee 2 irraa ajjeessee kanneen biroo hudduu madeesse.
WBO tarkaanfii diina irratti fudhataa jiru itti fufuun Hagayya 20,2009s Hararguma Dhihaa naannoo Dhungataa bakka Dhuubbaa je’amtutti mooraa waranaa wayyaanee weeraruun battalumatti loltoota sirnichaa 11 ajjeessee kanneen biroo 5 ol madoo taasisuu ajajni WBO godina Bahaa beeysisee jira.
Ajajaan 50 Ibarahim Mo’ed je’amu loltoota wayyaanee haleellaa WBOn ajjeefaman keessatti argama. WBOn haleellaa tanaan mooraa diinaa yeroof toohatuu isaas ajajni WBO Godina Bahaa mirkaneesseera.
Tarkaanfilee kanneeniin qawwee AKn 47 11, rasaasonni, boombiilen, uffanni waranaa, galaan waranaa , mallaynii fi galmeen ciccitii diinaa qaban hedduun WBOn booji’amanii dantaa QBOf oolfamus ajajni WBO godinichaa mirkaneessee jira.
Hanga sirni gabroomfataan wayyaanee guutummaa Oromiyaa keessa duguugamee bahuttis tarkaanfiin fudhatama jiru cimee akka itti fufu beeysise.
MOA
